William Morgan

Roedd yr Esgob wrth ei gannwyll

gyda'i bluen wen ar waith,

ac fe chwiliai hwyr a bore

am air Duw yng ngeiriau'n hiaith.

Fesul cytsain a llafariad,

fesul sillaf, fesul sain,

chwiliai'n galed am y geiriau

yng nholeuni'r fflam fach, fain.

Cytgan

Diolch, diolch am y stori

o ardd Eden i fab Mair;

diolch,diolch am y gannwyll,

am y geiriau, am y Gair.

Ac mae'r Esgob William Morgan

eto'n fyw o fewn ei waith;

eto'n fyw rhwng cloriau'r Beibl,

eto'n fyw ym mer ein hiaith.

Os oes clustiau'n gwrthod clywed,

os yw'n golau ninnau'n brin,

mae ei eiriau'n dal i siarad,

mae ei fflam yn dal ynghyn.

Ceri Wyn Jones