Il- Jum Oranġjo
Sabrina u James iltaqgħu fil-ġnien pubbliku taż-Żejtun biex jorganizzaw l-attivitajiet għal Jum Oranġjo li se jsir fl-24 ta’ Marzu.
Sabrina: James ħabbilt rasek sew fuq x’attivitajiet nistgħu
nagħmlu f’Jum Oranġjo l-iskola?
James: Ħsibt ftit mhux ħażin. Inti x’ġiek ġo rasek li tagħmel?
Sabrina: Jiena xtaqt li nagħmlu posters bi slogans u tpinġijiet kontra
l-ibbuljar u l-vjolenza. X’taħseb int fuq din l-idea?
James: Mhux idea ħażina, imma jien ħsibt li kieku aħjar nordnaw
flokkijiet oranġjo u fuqhom nagħmlu l-islogans u t-tpinġijiet.
Sabrina: Imma dawk jiġu jiswew ħafna flus!
James: Dak hu l-punt! Hekk mill-qliegħ tal-bejgħ tagħhom
niġbru fondi b’risq Dar Bjorn. Mhux idea tajba din ukoll?
Sabrina: Idea tajba kieku, imma jiena xtaqt li l-istudenti jkunu kreattivi u jieħdu sehem f’kompetizzjoni ta’ posters kontra l-vjolenza u l-ibbuljar. Jistgħu wkoll jagħtu donazzjoni meta jidħlu f’din il-kompetizzjoni.
James: Iva, ħsieb tajjeb għax hekk jistgħu jpinġu u jiktbu dak li jaħsbu fuq dawn it-temi. X’taħseb li kieku jintgħażlu l-aħjar posters u jiġu pprintjati fuq flokkijiet oranġjo li mbagħad jinxtraw mingħand l-istudenti?
Sabrina: Tajjeb. Hekk ikunu jistgħu jilbsuhom fl-24 ta’ Marzu. Għalhekk irridu nħaffu għax irridu naħsbu qabel u ż-żmien qed jagħfas ġmielu.
James: Rajt kif sibna kompromess! Issa jmiss li ngħidu lis-surmast u navżaw lill-istudenti. Żgur se togħġobhom l-idea!
Sabrina: Ejja ħa nibdew naħdmu fuq xi slogans li nistgħu nużaw
bħala eżempju għall-istudenti l-oħra! Naħsbu wkoll għall-posters li se nagħmlu madwar l-iskola bħala riklami u l-avviżi li se nqassmu lill-istudenti fil-klassijiet! Ħa nibdew.....
Massimo Parrella 6.1